البديهيات وأخرة الميدان ايه ؟

دى أول حاجه قررت أكتبها ,حسيت ان الأفكار لازم تتحط على ورق عشان معظم الكلام اللى بنقوله بيناقض بعضه وبيوصلنا دايما لحلول غير منطقيه وهزليه فى بعض الأحيان , هحاول اتكلم عن البديهيات والحاجات اللى المفروض اننا متفقين عليها يمكن نرجع نفكر تانى ونسخدم حتة اللحمه اللى فى الجمجمه: 

  .    :

أول سؤال هو هل اختارت الثوره السلميه ام الدمويه من أول يوم ؟ , بغض النظرعن العنف الضرورى للدفاع عن النفس ,فالثوره اختارت عدم حمل السلاح واعتقد انها هتستمر كده , لإعتبارات كتير منها طبيعة المتظاهرين وتسليح قوات الأمن و عدم وجود جهاز اعلامى ثورى يعمل كغطاء , الخ 

طيب ندخل على السؤال اللى بعده : ما مدى تأثير السلميه ؟؟ يعنى تقدر توصل لإيه لو فضلت سلمى وبالأعداد المتغيره دى ؟   لحد دلوقتى اللى قدرنا نوصله هو خلخلة النظام وإجباره على تقديم بعض التنازلات الشكليه أملا فى إحتواء غضب الناس وإعادة تطويقهم مره تانيه !! 

شكرا لمجهودكم وتضحياتكم , بس الفتره الأخيره اثبتت ان الطريقه دى غير قادره على اسقاط حقيقى لأى ركن من أركان النظام خصوصا مع امتلاك النظام لكل وسائل الإعلام واصراره على غسيل دماغ الشعب دوريا  , يبقى السلميه كانت غلط من الأول ولا محتاجه شوية تعديلات ؟؟

لو فرضنا انها هتفضل سلميه  وإن اى تغيير فى المعنى ده هيكلفنا كتير لاننا مش ناوين نمسك سلاح , يبقى التظاهر لوحده مش هيعمل حاجه جذريه وفى رأيي المتواضع احنا محتاجين مع المسيرات والحشد الشعبى كل مايلى ,

1-نشتغل سياسه بمعناها المعروف بالمراوغه والظغط والمساومه وقلب الحقائق بالتوازى مع الضغط الشعبى -بإختصار نبطل هطل وصراحه ومثاليه وف نفس الوقت نضم شرعية التمثيل السياسى لشرعية الثوره ونجبرهم على الهروب أو فضح نفسهم.

  

2-  التوافق بين أطراف الثوره تحت أى ظروف وبأى تنازلات ورفض إحتمالية الخلاف والتخوين اللى كلنا عارفين مين السبب فيه لأن بإختصار محصلة مجهودنا من غير توافق تساوى صفر .

3- خلق غطاء اعلامى شعبى والضغط على وسائل الإعلام لإظهار وجهة النظر الثوريه بشكل واضح وبدون تشويه

4- الأهداف المعلنه لازم تبقى واضحه ومختصره لايمكن تشويهها أو إعتبارها وجهة نظر علشان نخرج من دوامة : هم اللى فى التحرير دول عايزين ايه ؟؟ وكل مذيع يطلع يألف حاجه على مزاجه ويضيع مجهودنا ع الفاضى

مفيش انجرار لإشتباكات غبر بتخطيط  ومن غير فتح صدر ودم ببلاش , لو مش هتعرف تفشخهم زى 28يناير كدفاع شرعى عن النفس :))  يبقى  ما تعملش السبع رجال وتحرق قلبنا عليك والموضوع ده الشرح فيه يطول 

 

 أى عنصر ناقص من دول يبقى بنضيع وقت وبنضرب دماغنا فى الحيط قاصدين ونرجع نستغرب انها ورمت !

طيب :   ليه النظام مش عايز يسقط بالمظاهرات ؟

نتكلم شويه عن البديهيات

 : 

 

 محدش هيقولك تعالى استلم السلطه  وحاكمنى  والمجلس العسكرى مش أهبل عشان يسمح بسقوط النظام وسحب كل مميزاته وفتح 

1-  ملفاته ... متفقين ؟؟

مفيش نظام هيحاكم نفسه  ولا هيحاكم صبيانه خصوصا لو مش ناوى يسلم السلطه وعامل حسابه انه هيحتاجهم قريب -2

الطرف اللى معاه السلاح هو الأقوى غالبا إلا لو نجح الطرف التانى فى إبتكار وضع يغير الموازين ويكسب ثقة الشارع و يقتنص الشرعيه الشعبيه والثوريه والسياسيه مع بعضة -3

معظم الإشتباكات تم جرنا ليها  ودفعنا فيها تمن غالى اوى وكانت بدون تخطيط والعسكر كان هو اللى بيبدأها وينهيها وهو اللى بيحدد عدد الأسرى اللى عايزهم عشان يكسر نفسنا بيهم -4 !!  

الإعلام كله موجه  وضدنا وبيوصل وجهة نظر المخابرات بطريقه واضحه ومع ذلك احنا مصممين اننا نصدقهم ونصدق إشاعات و تخوين لبعض من خلال الإعلام وننشرها ! وبنتمرقع فى التوافق والخروج بموقف موحد للإعلام -5

الإخوان جماعه إصلاحيه حركتها تقيله وبطييئه و تميزت بلولبية القرارات :)  وضبابيتها بشكل مؤذى فى الفتره الماضيه  وده لا ينفى عنها دورها فى الثوره ومش هتكلم أكتر من كده لأن باقى الكلام جدليات واحنا المفروض بنركز على البديهيات -6

 لو نجحنا - أى الشعب-  فى الوصول  للحكم بأى صوره  (رئيس أو مجلس رئاسى أو رئيس وزراء ..إلخ) , أركان النظام هتحرق مصر وتلبسنا فى الشعب أو فى أحسن الأحوال هتحاول تعمل كده  لحد ما ننجح فى تفكيك منظومة المصالح -7

 

لو وصل مرسى للرئاسه ستحكم المحكمه بدستورية العزل وتعيد الإنتخابات وإحتمال بين ال12 مرشح وفرص عمرو موسى هتبقى فى السما لأن كالعاده المرشحين الثوريين هيتخانقوا وهيطربقوها  -8

لو وصل شفيق للحكم  مصر هتبقى بؤرة عنف وغير معروف الإحتمالات و النتائج الوقتيه ورد فعل الشعب اللى عايز يعيش, ومش محتاج أقول المنتمين للثوره هيشيلوا قواضى وجرائم شكلها ايه فى وسط العك ده  ومش هفصل الإحتمال ده لان عقلى رافضه -9

إحنا ولاد كلب (بس مش بنقول ع النت)   وبنكره بعض من جوانا وكل واحد فاكر نفسه صح والباقى غلط ونستاهل كل اللى بيحصل (بس الشهداء أنضف ما فينا) والعسكر استخدموا النقطه دى بشكل ممتاز -10 

هكتفى بالبديهيات دى لأن البديهيات كتير ومش هنخلص , المهم ده نموذج للحاجات اللى بنغفلها واحنا بنفكر

 

وبناءا عليه ؟؟  ايه المطلوب ؟؟ .  

 

أولا حتى لو مرسى ملاك مش هينفع يبقى رئيس لوحده لأنه هيتفشخ من العسكر, ثانيا مجلس رئاسى ده تلفه وتحطه فى عينك ,,, اومال احنا بنرغى فى ايه م الصبح ؟؟ هتنصب مجلس رئاسى سلميا إزاى ؟؟ هتشرب طنطاوى حاجه أصفره ولا هتشتبك مع الجيش وتحدف طوب !! ولو فرضنا ان طنطاوى مرر فكرة المجلس الرئاسى وحسسنا بالنصر زى 11فبراير  هيحصل فيه زى اللى حصل فى البرلمان بالكربون وزى ما هيحصل مع مرسى والإنقلاب عليه أسهل مايكون وأسهل من الإنقلاب على رئيس منتخب أصلا... طيب وإعادة الإنتخابات هتجيبلنا موسى بفرص عاليه وهتجيبلنا تانى نفس الخناقه بين حمدين وفتوح والجو الرخيص ده!!! 

يبقى حل اللوغاريتم ده ايه ؟؟ 

كيف تعزل العسكر وأصحاب رؤوس الأموال عن التحكم فى الدوله وتركيع الشعب ؟؟

نظريا الموضوع ده شبه مستحيل   وعمليا كل حاجه ممكن تحصل بتوفيق ربنا ولو شغلنا مخنا شويه ووحدنا مجهودنا صح ومن الأخر ده مش هيحصل قبل العركه الكبيره اللى بلا شك جايه جايه  * , المهم هيبقى موقفك ايه ساعتها وقوتك الحقيقيه عامله ازاى وبتحارب من موقف ضعف ولا موقف قوه.

انتهى حديث البديهيات  وهقول رأيي الشخصى  القابل للتغير لو إتضح ليا أفضل منه وأى نقد للرأى ده مرحب بيه جدا   

 

شايف ان انسب حل هو الجمع بين الحلول وغلق الثغرات على العسكر قدر الإمكان... يعنى مؤسسة رئاسه: مرسى رئيس منتخب وحمدين وفتوح نواب بمهام وصلاحيات واضحه على أن يتم الإعلان عن ذلك وتبدأ الدعايه للمنظومه دى حته واحده صورة مرسى جنبها حمدين وابو الفتوح فى بوستر واحد يستحيل معها التزوير لأن الحشد للحل ده هيبقى تاريخى ,,, بس كده ؟؟  لا , اومال احنا فى الميدان ليه ؟؟  احنا لازم نكسب أرض ونضيق عليهم ونسهل مهمتنا ونضمن عدم التزوير إزاى ؟  الأهداف واضحه وجذريه :

إقالة النائب العام وتعيين نائب عام بجد زى زكريا عبد العزيز - مثلا-  ,,, وده هيخلى أركان الفساد تسقط سقوط تلقائى لأن مكانهم الطبيعى هيبقى السجن -1

 تشكيل حكومه إئتلافيه واسعه الأن تشمل كل الوزارات وعلى رأسها الداخليه (مخزن السجلات وأسلحة التزوير) وده هيشل ايد ورجل المجلس وهيقلل فرص التزوير - بالمناسبه الهدف ده محتاج ضغط رهيب عشان يحصل وهو حاجه مش قليله ولا تافهه يعنى,,  -2  

الأهم من قانون العزل اللى المحكمه مش هتخلصه إلا لما العسكر يحتاجوه !! هو الضغط لتحريك القضايا الجنائيه ضد شفيق فورا ,,, أظن يعنى مينفعش يبقى مجرم ويدخل إنتخابات يعنى , على ألأقل هيدخل السجن بعد الإنتخابات وهيخسر أصوات كتير قبلها لو بدأ التحقيق معاه فعليا .. وده بردو محتاج وضوح المطلب وضغط قوى وإلتفاف عليه -3

مش هكتب الباقى لأننا إتفقنا انه لازم توحيد الأهداف وتلخيصها وتكون واضحه وغير قابله للتأويل لتجنب مشكلة : هم بتوع التحرير عايزين ايه مش فى انتخابات  :))  ,, * الأهداف دى لو إتحققت هتقلل قوة الصدام الحتمى وهتقلل الخسائر وهنكون فى موقف قوه يسمح لينا بإسقاط حقيقى للنظام قريبا ,

أخيرا: انا مش إصلاحى ولا ثورى ولا أى نيله ليها إسم ... انا مش عايز أموت ببلاش وعايز مصر تتحرر بأى طريقه كانت وبسرعه ومش عايز قلبى يتحرق على أحسن شباب بتموت ببلاش تانى إلا لو إضطرينا لكده..... عايز ءأكد  إن اللى قدر إن الثوره دى تقوم - سبحانه - هيكملها ومصر هتبقى عروسه بس إزاى ؟ وإمتى ؟ ده يتوقف بعد توفيق ربنا على توحدنا ومدى إستعدادنا اننا نستخدم حتة اللحمه اللى فى الجمجمه !!  

فى انتظار أرائكم

 المصادر: 

-  افكاركم المنتشره عندى فى التايم لاين  واللى ساعات بتاقض بعضها

- نقاش مع صديق إخوانى نقلا عن اللجنه العليا لحزب الحريه والعداله  كشف لي بنود المساومات الموجوده على الساحه  وموازين القوى وخطط العسكر للحفاظ على النظام من وجهة نظرهم,

- حتة اللحمه اللى عندى ف الجمجمه بعد متابعة النكسات السابقه على مدار عام